Sen consulta nin participación do conxunto da veciñanza, sen acordo cos grupos nin coas asociacións, sen exposición pública nin plan ningún nin encaixe nun proxecto de mobilidade para Celanova; ás présas, noutra carreira a cegas que en quince días pretende impoñer xa unha medida que nin se razoa nin se explica e que pon en evidencia o carácter rancio dun goberno local que nin escoita nin se preocupa de mirar como se implementan as políticas que afectan os usos das rúas e prazas públicas en calquera vila do país… así é o que o goberno de Antonio Puga anuncia estes días nun xornal e denomínao “unha peonalización do centro histórico”.

“Como se pode falar de humanización do centro urbano cando o que se presume é de “crear una gran área de estacionamiento a escasos 50 metros del espolón”, segundo publica o xornal, ou de que se sumarán 500 prazas de aparcadoiro e haberá unha área de 5.000 metros cadrados para coches nas Trigueirizas?”, cuestiona o portavoz do BNG, Leopoldo Rodríguez. “Que clase de humanización é esa que rodea con 500 vehículos a Praza Maior e o Mosteiro?”.

“Como se pode afrontar unha actuación coma esta sen ter informado aos grupos? Nós non fomos informados de nada, non vimos documento ningún, no pleno non se debateu nada… É un desprezo e unha falta de respecto polos grupos políticos que representan á veciñanza”, lamenta o portavoz do BNG.

“O que están a propiciar é un gran aparcadoiro no centro e que os coches accedan en maior cantidade ao corazón mesmo da vila. É a lóxica centro comercial, ou simplemente están a meter tráfico cara unhas fincas ao carón do Mosteiro e da Praza”, valora Rodríguez. 

"No BNG temos experiencia dabondo como partido de goberno e pioneiro nestas medidas en moitos concellos. Podemos achegar ideas para facer unha humanización de verdade e para que o espazo público sexa ocupado prioritariamente pola xente" (Leopoldo Rodríguez)

ABRIR UN GRAN DEBATE SOBRE O USO DO ESPAZO PÚBLICO PARA CONSENSUAR UNHA HUMANIZACIÓN DE RÚAS E PRAZAS.

O BNG preguntará ao goberno local polas condicións dos contratos cos propietarios das fincas nas que se van habilitar os aparcadoiros anunciados. E pide que se adíe a aplicación da medida e se convoque un proceso de participación veciñal para que os afectados (toda a veciñanza en canto usuaria do espazo público, non só comerciantes) poidan informarse, opinar e propoñer alternativas nunha posta en común. 

“E isto non é porque non nos interese a humanización. Ao contrario; no BNG temos experiencia dabondo como partido de goberno e pioneiro nestas medidas en moitos concellos. Podemos achegar ideas para facer unha humanización de verdade e para que o espazo público sexa ocupado prioritariamente pola xente, empezando polas propias veciñas e veciños. E a primeira idea é esta, que o proceso sexa aberto, democrático e se faga con tempo e paciencia”, conclúe Leopoldo Rodríguez.

O BNG de Celanova advertiu en xaneiro de 2020, antes da pandemia, da necesidade de abrir en Celanova un gran debate sobre o uso do espazo público e a mobilidade convocando a toda a veciñanza e actores sociais. O goberno local nin respondeu. 

Meses despois, durante o desconfinamento, quedou en evidencia a incompetencia dos actuais xestores en cuestións de planificación e alternativas para o espazo público coa aplicación chapuceira –que enervou a moita veciñanza– do que deberá ter sido un principio de humanización.

Agora, sen mirar nin sequera como se fan as cousas en vilas e cidades do país que levan anos de dianteira en materia de humanización, o goberno municipal paga un estudo e ninguén se molesta en abrir un proceso participativo (como é práctica habitual en calquera actuación desta envergadura) e volve incorrer na imposición desde arriba de políticas públicas.