Ao longo do ano 2022 e maiormente nas últimas semanas estanse a publicar nos sucesivos boletíns oficiais convocatoria e bases dos procesos selectivos para a selección do traballadores públicos incluídos nos cadro de persoal de estabilización de emprego temporal.
 

Pensamos que son inxustos porque o sistema de acceso vai ser na maioría dos casos o concurso onde se puntúan entre outros  méritos ser traballador da administración onde se dirixa a solicitude; unha vantaxe que só teñen aqueles que levan traballando aí todo este tempo. 

Isto é mais grave se cabe na maioría das administración locais (Concellos, Mancomunidades e deputacións) onde moitos dos postos de traballo temporais fóronse ocupando por enchufes e sen un proceso de selección previa (listas de contratación, bolsas de emprego...,como si hai na administración autonómica ou na estatal); e nalgúns casos incorrendo en fraude de lei como contratar laborais para postos de funcionarios como pasou no Concello de Cartelle. 

No caso de noso Concello de Cartelle a data de publicación foi no BOP do mércores 21 de decembro e afecta a case ao 100% do seu persoal. E no caso da Mancomunidade  foi no BOP do martes 20 de decembro e tamén afecta a case o 100% do persoal.

A propia lei asume na súa exposición de motivos a existencia nas administracións españolas dun abuso por veces fraudulento da figura do persoal interino e do persoal contratado temporal.

A norma que obriga e vai regular estes procesos de estabilización é a Lei 20/2021 do 28 de decembro, de medidas urxentes para a redución da temporalidade onde fai referencia na súa disposición adicional sexta a : “Convocatoria excepcional de estabilización de empleo temporal de larga duración”, para aquelas prazas ocupadas con carácter temporal de forma ininterrompida con anterioridade ao 1 de xaneiro de 2016. 

O denunciable desta situación é o que a propia lei asume na súa exposición de motivos: a existencia nas administracións españolas dun abuso por veces fraudulento da figura do persoal interino e do persoal contratado temporal.

En resumidas contas o que di a norma, que dito sexa de paso é unha esixencia da Unión Europea, é que as administracións públicas deben convocar con regularidade e incluír eses postos nas súas ofertas de emprego anuais para que todo fillo de veciño se poida presentar en igualdade de condicións e non se convertan en instrumentos de fidelización do voto ou en prebendas a repartir entre familiares e cargos do partido gobernante de quenda como pasa en Cartelle, na Mancomunidade de Celanova e na propia Deputación de Ourense.

Manuel Ferro, militante do BNG de Cartelle.