O BNG levará ao pleno deste mércores en Celanova a proposta para a creación do Consello Municipal de Igualdade “que sirva como ferramenta de diálogo entre a Administración local e o movemento feminista do concello”.

As nacionalistas piden que no organismo estean representadas as forzas políticas, o persoal técnico do Concello, incluíndo a responsábel do CIM (Centro de Información á Muller) dependente da Mancomunidade, así como as distintas asociacións. 

Na mesma iniciativa, presentada coincidindo co día internacional contra a violencia de xénero, o 25-N, o BNG demanda que o Concello de Celanova reclame da Xunta de Galiza un incremento dos recursos económicos destinados a loitar contra a violencia de xénero até alcanzar “como mínimo o 1% do orzamento”. Tamén piden que se solicite á Xunta “a mellora da atención e prevención da violencia machista, particularmente, da violencia sexual”, así como ao Goberno central cambios normativos para introducir no marco legal o concepto de “consentimento” e garantir que o sexo “non consentido sexa tratado sempre coma un delito”. 

Na proposta, as nacionalistas reflexionan sobre a alerta lanzada pola Fiscalía do Estado “sobre o aumento da violencia e os delitos de natureza sexual entre as persoas máis novas” relacionado coa “preeminencia da pornografía nas redes sociais”.

Outras mocións

Nesta mesma sesión, o BNG presentará outras dúas iniciativas. Unha, en relación á perda do servizo de radiodiagnóstico no Centro de Saúde de Celanova que afecta a quince concellos das comarcas da Baixa Limia e Terras de Celanova. E outra solicitando do goberno municipal que inicie os traballos para construír a piscina cuberta comprometida nos acordos de investidura entre o BNG e o partido do alcalde, e que constitúe “unha demanda histórica” da veciñanza da vila.