“É necesario que os mercados de proximidade funcionen, que nos nutramos nas aldeas, nas vilas e nas cidades de produtos que producimos aquí, para termos unha mínima soberanía alimentaria”, dixo Xosé Luís Rivas ‘Mini’ diante da Praza de Abastos, edificio emblemático dos anos trinta que o BNG pretende revitalizar e converter no eixo dun novo modelo de feiras e comercio local, no camiño do quilómetro cero, para devolver vida ao rural e asentar poboación que quere traballar e vivir nesta comarca.

Falou Xosé Luís Rivas xunto a Xan Carlos Grande, produtor local orientado á sustentabilidade, e que acompañará Vanessa García na candidatura do BNG na Bola nas municipais do mes que vén. Falou xunto a Fernando Conde, produtor local e candidato do BNG na Merca, quen animou ás asistentes a se “xuntar, coñecernos, saber que podemos ofertar e cooperar para facernos visíbeis e facer visíbeis os nosos produtos”. 

“Todo está por crear nesta comarca”, subliñou Fernando. “É preciso facer pedagoxía co consumidor, que a xente entenda a importancia de consumir local, consumir verde, ecolóxico ou sustentábel. E como nós, os produtores, podemos facer marca para nos posicionar nos mercados”.

Diante duns corenta asistentes, nunha mañá de moito sol, ‘Mini’ Rivas lembrou a etapa do equipo de Suárez Canal á fronte das políticas de medio rural da Galiza como unha etapa luminosa e exemplar. E deixou unha mensaxe para a esperanza e o traballo. “Non hai nada perdido. Está todo por facer. O país está aí. E como din Xan e Fernando, temos que entender a importancia, mesmo para loitas globais como a loita contra o cambio climático, da produción e consumo de proximidade. Ademais, porque lles podemos poñer caras a eses produtos, ver como e onde se elabora, saber quen os traballa. Somos nós, son Fernando e Xan”, afirmou o deputado do BNG no Parlamento galego.

O BNG recollerá nos programas electorais das localidades de cara ás próximas municipais algunhas das ideas e propostas que se puxeron sobre a mesa e continuará mantendo encontros con produtores e comercializadores para animar un traballo continuado e conxunto.

O sábado 22 de abril, no salón de actos do Refectorio do Mosteiro de Celanova, Ana Pontón, portavoz nacional do BNG, presentará as 7 candidaturas do BNG na comarca de Terra de Celanova. Será ás 7 da tarde.