Teresa Barge, alcaldesa da Bola do Partido Popular, oculta os informes de Intervención e de Secretaría a respecto dunha contratación municipal.

Na tramitación dun contrato municipal dun axente TIC, as nacionalista aprecian posíbeis contradicións coa nova reforma laboral dadas as condicións de precariedade e temporalidade do contrato.

Así, Vanessa García, concelleira e portavoz do BNG na Bola, solicitou por escrito os informes de Intervención e Secretaria do Concello da Bola a respecto da convocatoria para “a contratación de persoal laboral temporal, baixo a modalidade de obra ou servizo determinado dun axente TIC”, publicada no Boletín Oficial da Provincia do luns 27 de febreiro de 2023.

O BNG fixo a solicitude ao día seguinte da publicación no BOP, e desde a Alcaldía responderon o 6 de marzo NEGANDO o acceso á información solicitada co único argumento de que: “non sabemos a motivación concreta e circunstanciada do que se solicita”.

O BNG, en exercicio do labor de control e fiscalización dos órganos de gobernos, volveu solicitar a semana pasada o acceso a eses informes de Intervención e Secretaría subliñando que na resolución da Alcaldía para a contratación podería haber irregularidades contrarias á normativa.

A resposta volveu ser unha NEGATIVA.

Non é a primeira vez que Teresa Barge intenta obstaculizar o labor de control por parte do grupo da oposición. Nalgunha ocasión, mesmo chegou a esixir ao BNG o pagamento dunha taxa para recibir fotocopiado un expediente municipal.

Vanessa García, portavoz nacionalista no Concello da Bola, vén denunciando estas prácticas de obstrución en casos como o do falso policía contratado pola alcaldesa ou os atrasos no cumprimento dunha orde de derrubo dunha construción ilegal. Mais Barge incumpre sistematicamente as obrigas de atender as peticións de información e transparencia.

A alcaldesa da Bola pretende xestionar os asuntos públicos con opacidade e sen debate público ningún, como se non houbese oposición. Mais haina. Ela saberá o que quere agochar. O BNG vai seguir traballando até o final para abrir as fiestras e que corra o aire, que todos os veciños podan saber do que acontece no concello e haxa igualdade de oportunidades e transparencia na xestión.