De todos é sabido que unha das reivindicacións do nacionalismo galego é a recuperación e posta en valor do noso patrimonio cultural e arquitectónico.

Tal patrimonio dá conta da nosa historia pasada como pobo, dos asentamentos nos que morabamos ou da organización territorial da que dependiamos.

Dende o ano 2008 o Bloque Nacionalista Galego de Cartelle leva reclamando a rehabilitación da Torre de Sande. Primeiro durante o goberno bipartito na Xunta cando se lle formulou ao daquela Delegado de Cultura a recuperación da torre e  que se plasmou na redacción dun proxecto de rehabilitación, proxecto que non foi posible levar a cabo polo cambio de goberno. E logo, dende a oposición, tanto no Concello como no Parlamento galego.

Tamén aproveitamos para informar que o ano pasado o BNG de Cartelle, a través dos deputados no parlamento galego, presentou dúas emendas aos orzamentos da Xunta do ano 2023 para iniciar os traballos de recuperación do Castro do Santo en Vilar de Vacas e do Castro da Cidade de Pereda.

Os deputados do BNG no parlamento galego pediron que os orzamentos da Xunta do ano 2023 contemplasen o inicio dos traballos de recuperación do Castro do Santo en Vilar de Vacas e do Castro da Cidade de Pereda.

O investimento na rehabilitación do patrimonio, en contra do que algúns pensan, non é  un gasto de cartos inútil ou unha perda de tempo. A recuperación do patrimonio acaba revertendo na economía local vía restauración, hospedaxe ou comercio. 

Alguén pode negar a relación entre a oferta hoteleira e restauración e o patrimonio existente na comarca?: Castromao, Mosteiro de San Salvador, Campamento Romano Aquis Querquennis, Santa Comba de Bande, termalismo e Parque do Xurés.  

Por tanto non entendemos desde o BNG de Cartelle o pouco interese que mostra o grupo do Partido Popular de Cartelle pola recuperación do noso patrimonio arqueolóxico.